Dae Ye Mynd Langsyne

I look doun frae the Gowk Stane
Tae the valley o’ the Blane,
and I think of aw the things there was
when I was just a wean,
I see the bairns playin’
and wonder if they ken,
of ony of the games we played,
and still say cock or hen.
There was kick the can and hunchy
and chap door run ,
and if they nearly caught ye it was pairt o’ the fun,
wi’ a puddock in a pocket and worms in a tin,
showed them tae the lassies tae mak them scream and rin,
Plunked the schule tae howk the tatties
and help tae stook the corn.

I look doun frae the Gowk Stane
tae the place where I was born
at Finlays o’ the Cuilt we gethered in the kye,
and stood at the crossing gate tae watch the train go bye
then Telfors Shop for sweeties and aw the things we’d like
and tak a rin ower tae Stra’blane wi twa up oan a bike
and Lena wi a telegram wad send you oan a trip
and hope the news was no’ that bad
as ye waited for the tip.
There was some that duin the milk
whiles ithers duin the papers
and some duin nothin’ much at a’
their life was fu’ o capers
wi gang huts doun the filters and pictures at Milngavie
and some duin some ither things
that made their mithers cry.

I look doun frae the Gowk Stane
tae the valley o’ the Blane
and I think of aw the things there was
when I was just a wean,
so play awa wee bairnies
frae Blanefield and Stra’blane
for the day will come when you will wish
that you were juist a wean.

Murray O Donnell 1992